Revolution Records in Madrid, Spain ! [ Redbull Bedroom Jam 2012 ]

Revolution Records – RedBull Bedroom Jam #RBBJME

http://redbullbedroomjam.me/show-2-revolution-records/

فريق الثورجية رفليوشن ريكوردس على بعد خطوة واحدة من تسجيل أول ألبوم رسمي في استديو ريدبول أسبانيا … في أيدك انك تساعد الفريق بطريقة سهله جداً ….
صووت – أعمل لايك – تويت – أكتب كومينت ( كل دا مش هياخد منك دقيقة )
التصويت ممكن يتعمل كل 12 ساعه مرة .. مش مرة واحدة بس !!!
افتح اللينك .. أختار ال 5 نجوم من تحت الفيديو .. أعمل لايك و تويت.. ويا سلام كمان لو كتبت كومينت ;) ..

لو بتشجع الفن الهادف .. و مقتنع بأن دا الوقت انك تساعد الهيب هوب وتثبت انه فن زي بقيت أنواع المزيكا وشايف فريق الثورجية يستحق تمثيل الهيب هوب المصري بالبوم حقيقي .. الفرصة قدامك وادينا صوتك …
ونوعدك أنك هتاخد ألبوم يرفع راس أي حد عملنا فوت

http://redbullbedroomjam.me/show-2-revolution-records/
——————————————————————–
Vote For Revolution Records by Rate the 5 Stars To Help the band recording the 1st official Album In Redbull studio Spain .. VOTE / like / tweet and SHARE it ..

http://redbullbedroomjam.me/show-2-revolution-records/

thank’s guys
Revolution Records

عصيان مدني 11 فبراير .. خليك ايجابي وشارك

عصيان مدني 11 فبراير .. خليك ايجابي وشارك

مبدأيا كدة خلينا نقول اية هو العصيـــان المدنـــي … ؟

العصيان المدني هو أحد الطرق السلمية اللي بيعترض ويثور بيها الناس على القوانين غير العادلة ..  وهو ان الناس بتمتنع عن التعامل مع مؤسسات الدولة لفترة زمنية حتي يتحقق مطالبهم

طيب ازاي الناس تطبق العصيان المدني ؟؟

الامتناع عن الذهاب الى العمل العام والخاص ماعدا الاعمال الضروريه زي الدكاترة مثلا والحالات  الانسانيه الطارئه  والحرفية البسيطة
الامتناع عن الذهاب للجامعات والمدارس والمعاهد والكورسات وكل دة
الامتناع عن دفع الضرايب
الامتناع عن تحصيل رسوم الخدمات من كهرباء ومياه وغاز وتليفونات
النزول الي الشارع في وقفات صامتة ولبس اللون الأسود زي ما عمل شباب الإسكندرية بعد وفاه خالد سعيد رحمه الله
الجلوس في البيت وتعليق علم مصر من البلكونة او وشاح اسود اعتراضا على حكم العسكر هو ايضا

—————————–

طبعا أهم حاجة في العصيان المدني عدد المشاركين فيه والإجماع عليه  من الشعب وبما ان احنا عندنا ناس لازم تطلع وتخون وتحزر وتصووت وتهلل بان حرام عليكوا هاتخربوا البلد والحاجات اللي احنا حافظينها دي فدي أهم التساؤلات والرد عليها علشان تتأكدوا ان دي وسيلة ضغط سلمية ولا هاتوقع اقتصاد ولا هاتولع في البلد زي ما بيدعووا فمثلاً

 يقول البعض أن الإضراب و الإمتناع عن سداج الفواتير سيؤدي إلي عدم دفع الرواتب حيث أنه لا يوجد دخل للمؤسسة أو الشركة
الرد : أعتي و أطول العصيانات المدنية كان في بولندا عام 1989 ضد الحكم العسكري و إستمر فقط 11 يوم و هو العصيان الأطول في التاريخ ضد أكثر الأنظمة ديكتاتورية….و هذا يوضح أنه لا حكومة في العالم تستطيع تحمل العصيان المدني أكثر من أسبوع و أكثر بقليل …و لن يستمر بأي حال من الأحوال إلي شهر أو يؤدي إلي عدم دفع للرواتب…كما إن الثورة المصرية إستمرت 18 يوم كان أكثر نصف الك المده في حالة كساد تجاري كبير و مع ذلك لم يؤدي الأمر إلي الإمتناع عن دفع الرواتب
لذا فهذه الحجة هي غالبا حجة معشر أعداء الثورة الذين أصلا كانوا يرون أن الثورة خرابا

 لو إنت شغال في قطاع خاص مش حتلاقي مواصلات تروح بيها الشغل
الرد: حدث في مصر في الأونة الأخيرة بعد الثورة العديد من الإضرابات العمالية و الإعتصامات أشهرها إضراب عمال النقل العام عن الأتوبيسات الذي إمتد في جميع أنحاء الجمهورية و تبعه توقف تام في حركة أتوبيسات النقل العام التي تعد من أهم وسائل النقل في مصر…لذلك فهي لن تكون أول مرة تتوقف فيها المواصلات و لكنها هذه المرة للصالح العام
كما إنه لو مفيش مواصلات تروح بيها شغلك في القطاع الخاص فهذا لا ينطبق علي شخص واحد فقط بل علي جميع العاملين معاك في الشركة و لن يستطيع أبدا المدير خصم أو فصل جميع العاملين بالشركة بالإضافة أنه حيكون مش بإيدهم

لو إنت شغال باليومية مش حتعرف تروح شغلك

الرد: قلناها مئات المرات العصيان المدني هو الإمتناع عن العمل أو أي وسيلة إتصال مع الشركات الحكومية و ليست الأعمال الحرفية الخاصة لذلك أصحاب اليوميات سيكونوا أقل فئة تأثرا بهذا العصيان في الواقع سيكونون هم الفئة الوحيدة في هذا الوقت التي تجني مالا

 لو مريض مش حتلاقي مستشفي أو دكتور و لو عاوز دواء مش حتلاقي صيدلية

الرد: إنت بقي كمل كلامه و قول له لو في حريقة مش حتلاقي مطافي …..ثم رد عليه أنه للمرة المليون نقولها العصيان المدني لا يشمل الوظائف الحرجة الضرورية مثل الأطباء و المستشفيات و الصيدليات و الإسعاف و المطافي

لو مش معاك فلوس مش حتعرف تسحب فلوس من البنك علشات قافل

الرد: غالبا صاحب الحجة دي مش عايش أصلا في مصر ولا عارف حالنا عامل إزاي…قول له إن نسبة المصريين اللي معاهم فلوس في البنك و بيسحبوا منها أقل من 5% ….ده أصلا
أكثر من 60% من المصريين عمرهم ما دخلوا بنك…إتهام ساذج للطبقة العليا المرفهة في مصر و التي لا تريد أن تشقي يومين لصالح البلد

لو مدفعناش الفواتير حيقطعوا علينا المياه و الكهرباء و الغاز

الرد : ليس من حق السلطات والمؤسسات أن تقطع تلك الخدمات عن المواطنين بشكل جماعي سواء كأحياء أو مدن أو غير ذلك فهو غير قانوني تماما مثل عدم قانونية قطع الإتصلات أيام الثورة وبعدين المياه بتتقطع عليك في البيت لما ماتدفعش 3 شهور ورا بعض وتتراكم عليك الفلوس لكن العصيان المدني عمره ما هايوصل لشهر اساسا .. اطول عصيان مدني في التاريخ استمر 11 يوم وبعديها اتحققت كل مطالب الناس

بس العصيان المدني دة حرااااااام شرعا

 د. نصر فريد واصل/ مفتي الجمهورية السابق : الإضراب ضرر ، لكن إذا كان يتحقق به رفع ضرر أكبر فهو يصل إلى درجة الوجوب

طيب هو العصيان المدني دة يعني ليه أمثله نجحت قبل كدة ؟؟؟

طبعا .. تقريبا كل حالات العصيان المدني نجحت وحققت مطالبها يعني مثلا عندك بولندااا  استمر 11 يوم ودة اطول عصيان مدني ونجح وحقق كل مطالبة وعندك الهند أكيد كلنا سمعنا عن غاندي والعصياان اللي عمله ضد الاحتلال البريطاني ونجح نجاح باهر وعندك جنوب افريقيا عصيان كيب تاون واللي كانت نتيجته انهاء الفصل العنصري بين الشعب وعندك امريكااا وعصيان مارتن لوثر كينج وعصيان النشطاء السياسين هناك ضد حرب فيتنام وعندك  بلغاريا سنة 2000 وسلوفاكيا سنة 1998 وكرواتيا سنة 2000

ولو ماتعرفش .. مصر عملت عصيان مدني نااااجح في ثورة 1919 وحقق مطالبة

———————————————————–

يعني من الأخر كدة العصيان المدني دي وسيلة سلمية هانضغط بيها علي المجلس العسكري علشان يسلم السلطة للمدنين وعلشان نعيد هيكلة الداخلية اللي كل يوم بتقتل عشرات المصريين وبيعملوا مؤامرات عليناا .. هاتقولي المجلس هايسلم السلطة لوحدة أهو بعد كام شهر هاقولك طيب مهوو بقالوا أكتر من سنة اهوو بيوعدنااا ومبينفذش وعودة الا لما بنضغط عليه بمظاهرات واعتصامات بيروح ضحيتها شهداء جديدة .. اما العصيان المدني دي ولا فيه حرق مباني ولا فيه بلطجة علشان محدش يبقالوا حجة

العصيان دة عامل بالظبط عامل زي الريجيم هاتحرم نفسك شوية من الاكل وماتكلش اللا اللي يكفيك بس في الاخر هترتاح بقيت عمرك وهاتبقي كويس .. طيب ما أيام الثورة ال18 الاولي كانت البلد واقفة تماما ومفيش شغل والبرصة واقفة .. بس بعديها البورصة ذادت صاردرات مصر ذادت 17 في المية والاقتصاد ارتفع وقناه السويس دخلها ذاد 25 في المية عن الطبيعي ؟.. هانتعب شوية بس هنرتاح بعد كدة ان شاء الله .. وربنا يعمل اللي فيه الخير لمصر

تمت الاستعانة بالعديد من المراجع والمدونات في كتابة الموضوع

written by : Ahmed Rock  ( https://twitter.com/TheBiggBoy )

أسبوع الجرافيتي العنيف .. اتبرع ولو بكلمه عالحيط

أسبوع الجرافيتي العنيف .. اتبرع ولو بكلمه عالحيط

Mad Graffiti Day

إيمانا مناا بأن الثورة لم ولن تكون غير في الشارع .. وتحقيقا لمبدء الفريق في نشر ثقافة الهيب هوب في مصر مع صبغها بالصبغة العربية المصرية ولأن فن الجرافيتي أحد أهم عناصر ثقافة الهيب هوب .. فبدأ فريق رفليوشن ( الثورجية ) في دعم حملة ( أسبوع الجرافيتي العنيف ) بجميع شوارع مصر في الفترة ما بين 13 يناير وحتي 25 يناير 2012 ..

وتتلخص الفكرة في أن أي حد بيحب فن الجرافيتي .. هانعرفه إزاي يرسم جرافتي بطريقة احترافية .. وفي الفترة ما بين 13 لحد 25 يناير هاننزل في مجموعات غير معلنة كل مجموعه في منطقة في اسكندرية .. ونرسم جرافيتي علي الحوائط ( دعوة للنزول يوم 25 يناير )

* الناس اللي هاتشارك معانا تكتب هنا علي الوال في الايفينت واحنا هنتواصل معاهم في الانبوكس علشان نعرف كل ناس هي في انهي مجموعه وهاتعمل اية بالظبط

* الموضوع مش مكلف خاص كل اللي هاتحتاجه علبة اسبراي ب 7 جنيه و فرخ كرتون ب 2 جنيه

* التجمع هايكون سري يعني متقولش انت نازل فين وامتي الا للناس اللي هاتنزل معاك .. 

* وقت الرسم هايكون من الساعه 4 الفجر لحد الساعه 8 الصبح ( الشوارع تكون فاضية علشان ولاد الحرام و المواطنين الشرفاء كتير ) 

* محدش ينزل يرسم لوحده .. لازم تكون مجموعه لا تقل عن 3 او 4 اشخاص ( هانظبط الموضوع معاك في الانبوكس )

* كل الشغل اللي هانعملة يا ريت نصوره علشان ننشر الصور بتاعه الناس ونحمس الناس انها تنزل اكتر

* يا ريت تختار أماكن حيوية بيمشي بيعدي عليها ناس كتير علشان الجرافيتي بتاعك يتشاف ويبقي مؤثر

——

طريقة عمل ورسم الجرافيتي ..

أسهل طريقة لرسم جرافيتي احترافي هي طريقة الطباعة او التفريغ :

الطريقة دي سهله جدا وهي عباره عن انك بتطبع التصميم اللي انت عاوزة علي ورقه وبعديها تفرغها وترشها علي الحيطة بالاسبراي .. الموضوع سهل وهنشرحة بالتفصيل ..

** الادوات اللي بنحتاجها .. 

1- ورق كرتون .. وده سهل اوي تجيب الفرخ منه ب 2 جنيه من اي مكتبة

2- علبة او علبتين رش اسبراي .. وده سعر العلبة 7 جنيه ممكن تجيبه من اي محل بتاع بويات ويا ريت نركز علي اللونين الاسود والاحمر

3 – كاتر جديد .. المهم يكون الكاتر حامي علشان ميعملش شرشرة في الورق 

4 – بكره لزق او سكوتش علشان نلزق الورق علي الحيطة 

** خطوات عمل الجرافيتي ..

1- تحتار التصميم اللي انت عاوز ترسمه .. التصميم بيكون لون واحد بس علشان نقدر نحدد الأجزاء اللي هنفرغها وهانجمع هنا في الايفينت مجموعه تصميمات جاهزة للطباعه واختار منها اللي انت عاوزه

2 – اطبع التصميم علي ورق عادي ببرنتر كمبيوتر .. ولو التصميم كبير ممكن تقسمه علي كزا ورقة 

3 – نلزق الورق اللي طبعناه علي فرخ الكرتون بصمغ مثلا .. 

4 – نبدأ نفرغ الجزء الأسود من الورق والكرتون باستخدام الكاتر ..

5 – نروح علي الحيطة اللي هانرسم عليها ونلزق الكرتون باستخدام اللزق او الاسكوتش ونثبته كويس

6 – ترش الفراغات اللي في الورق بالاسبراي ..

7 – تشيل الورق هتلاقي الجرافيتي مرسوم علي الحيطة مظبوط .. وتروح لمكان تاني وتكرر نفس الموضوع

فيديو بيوضح طريقة تقطيع ورش الإستانسل

————-

أيفينت الحملة علي الفايس بوك ..

للتواصل معانا ..

أسبوع الجرافيتي العنيف .. اتبرع ولو بكلمه عالحيط

By. Ahmed Rock

يوم 25 يناير 2012 .. انهاء احتلال العسكر

يوم 25 يناير 2012 .. انهاء احتلال العسكر

25/1/2012

طبعا اليومين دول حديث الساعه هو يوم 25 يناير 2012 سواء كان من ناس بتحضر وبتحشد لليوم دة باعتبار دة الأمل في استعادة الثورة من العسكر وشلة المصلحجية اللي استولوا عليها .. او من المواطنين الشرفاء اللي هما حبايب الاستقرار وهواه العويل والنواح ومنكوا لله خربتوا البلد ومصر بتتحرق .. 

ظهرت بقي الفترة دي مجموعه من الناس بتنادي بحق المجلس العسكري في الخروج الأمن من السلطة .. واللي يقولك مجلس الشعب يصدر قانون بحماية اعضاء المجلس العسكرى واعطائهم حصانة علشان محدش يفكر يقاضيهم لو سابوا السلطة .. وقال اية ( مهو يعني المجلس العسكري معملش حاجة تستاهل دة كلو ! وكفاية انهم حموا الثورة وحافظوا عليها .. ) 

طب تعالوا بقي كدة نفكر بعض بانتهاكات المجلس العسكري في حق الثورة من يوم 25 يناير اللي فات لحد النهاردة ( سنة كاملة )

يناير وفبراير 2011

هنبدأ بحاجة بسيطة كدة .. في ال 18 يوم بتوع الثورة قام العسكر باطلاق طائرات حربية فوق ميدان التحرير بارتفاع منخفض جدا للأرض بهدف تخويف المتظاهرين اللي كانوا معتصمين في الميدان وقتها قبل التنحي .

مساعدة العسكر للبلطجية في موقعه الجمل عن طريق اخلاء الطريق ليهم وفتحهم للبوابات والمتاريس المؤدية لميدان التحرير بالإضافة لاعترافات البلطجية اللي اتمسكوا ان الجيش كان بيسهل تحركاتهم عادي .

اعتقال المواطنين والنشطاء في شهر فبراير وبالتحديد منذ انطلاق حملة لا المحاكمات العسكرية في ٢٦ فبراير لما تم اعتقال 10 مواطنين مدنين ووقفهم أمام محكمة عسكرية وصدر حكم ضدهم بالسجن لمدة ٥ سنوات بعد اتهامات كاذبة وبدون تحقيق ومنهم الناشط عمرو البحيري .

مارس 2011

 هجوم الشرطة العسكرية علي ميدان التحرير واعتقال ما يقرب من مائة متظاهر وتعرضهم للضرب والسحل ومن ضمنهم 18 فتاه واللي اتعرضوا لواقعة كشف العذرية الشهيره وكان من بين المعتقلين أيضاً الممثل المسرحي علي صبحي الذي أذاع التليفزيون المصري صورة له على انه بلطجي وسوابق وكان هيتحاكم لولا ان اصدقائوا قاموا بحملة كبيرة ضغطوا بيها علي المجلس .. وغير كدة في ناس كتير اعتقلوا اليوم دة ولحد النهاردة محدش يعرف عنهم اي حاجة

وفي نفس الشهر بدأت حملة اعتقال المدونين والناشطين اللي بيكتبوا رأيهم وبيفضحوا أفعال المجلس العسكري علي الانترنت سواء في مدواناتهم او في تويتر والفايس بوك وأشهر المعتقلين الوقت دة كاان المدون مايكل نبيل واللي كانت التهمه الموجهه اليه “إهانة المؤسسة العسكرية” ودة بعد ما نشر موضوع في مدونته وجمع فيها كل صور وفيديوهات أنتهاكات المجلس العسكري في الوقت دة !

أبريل 2011

قام الناشطين بتنظيم مسيرة يوم الجمعه علشان يوقفوا المحاكمات العسكرية .. وفي اليوم دة انضم مجموعة من ضباط الجيش الشرفاء للثوار وبدأوا في فضح المجلس العسكري ويقولوا شهادتهم عن الانتهاكات اللي بيقوم بيها المجلس وبيعلنوا انشقاقهم من الادارة الفاسدة للعسكر .. فقام الجيش بإقتحام الميدان في هجوم عنيف جدا يعتبر اكثر الاعتدائات دموية ( حتى ذلك الحين ) ونتج عنه مقتل شخصين على الاقل من المدنين .. وتصفية للضباط المنشقين و من لم يُقتل من الضباط الذين أعلنوا انضمامهم للثوار تعرض للخطف ومحدش يعرف عنهم أي حاجة لحد اللحظة دي .

28 يونيو 2011 .. الإعتداء علي أهالي الشهداء المعتصمين في الميدان

23 يوليو 2011 .. الاعتداء علي مسيرة سلمية للمتظاهرين في العباسية واللي طلع المجلس اشاعه ان اللي اعتدي علي المسيرة هم اهالي العباسية لعدائهم للثوار واستشهد المواطن محمد محسن اليوم دة .

1 أغسطس ( أول أيام شهر رمضان ) .. هجوم الشرطة العسكرية العنيف علي المعتصمين في ميدان التحرير ومحاولة فض الاعتصام بالقوة وتم استخدام قوة مفرضة ضد المدنين واعتقال المزيد من المدنين ومحاكمتهم عسكريا

9 سبتمبر 2011 الإعتداء علي المتظاهرين أمام السفاره الإسرائيلية واستخدام العنف من الشرطة العسكرية

30 سبتمبر 2011 الاعتداء علي المتظاهرين واعتقال 13 شخص من ضمنهم طفل قاصر عمره 13 سنة عند وزارة الدفاع .

أكتوبر 2011

 أحداث ماسبيرو الدموية التي راح ضحيتها ٢٤ قتيل وجرح المئات واعتُقل نحو ٢٨مواطن .. قام العسكر بمهاجمة مسيرة المتظاهرين أمام ماسبيرو في محاولة لفض اعتصامهم وقاموا بأعمال وحشية مثل دهس المتظاهرين بالمدرعات واستخدام الرصاص الحي واللي كان من ضمن ضحاياه الشهيد مينا دانيال وهو ناشط كان له تواجد بارز في اعتصامات ميدان التحرير طول الفترة السابقة ونتيجة لضغط الرأي العام كلف المجلس العسكري لجنة مختصة بتقصّي الحقايق وبعدها قامت النيابة العسكرية بنشر لائحة بأسماء المتهمين في إحداث فتنة وشغب علي حد تسميتهم وكان اسم الشهيد مينا دانيال على رأسها !!!

 تم القبض علي عدد من النشطاء السياسين والمدونين في الفترة دي ومن ضمنهم الناشط علاء عبد الفتاح في٣٠ أكتوبر

نوفمبر 2011 

موجة جديدة من الاحتجاجات والتظاهرات بالقاهره والإسكندرية وعدد من المحافظات تطالب بانهاء حكم العسكر ونقل السلطة لحكومة انقاذ وطني مؤقتة .. وتم الهجوم من الشرطة العسكرية والأمن المركزي علي الاعتصامات في التحرير وسموحة بالاسكندرية واستخدمت فيها قوات الأمن المركزي وقوات الشرطة العسكرية أسلحة متنوعة تضمّنت الحجارة والمطاط والذخيرة الحية ومجموعة من قنابل الغاز واللي اثبتت المعامل الجنائية بعدها انها تحتوي علي مواد محرمة دوليا في الحروب زي الفسفور الأبيض وغاز الاعصاب وادي هذا الهجوم الي قتل ما يقرب من ٢٨ متظاهر وأصيب نحو الألفين وفي نهاية ذلك الأسبوع الدموي صدر تقرير من منظمة العفو الدولية يسلّط الضوء على الانتهاكات لحقوق الإنسان من قِبَل المؤسسة العسكرية منذ قيام الثورة

انتقل الاعتصام بعد كدة من التحرير لمجلس الوزراء بعد تعيين كمال الجنزوري رئيس وزراء وهو احد الحرس القديم في صفوف فاسدين مبارك

وبدأت انتخابات مجلس الشعب في الوقت دة

ديسمبر 2011

بعد احتجاز أحد المعتصمين داخل مبنى مجلس الشعب وتعرضه للضرب والسحل بطريقة وحشية من قوات الشرطة والجيش مما أدي الي اشتباكات بين المعتصمين وأفراد من الجيش وقام اثنائها رئيس الحكومة بتهديد المعتصمين بانه قادر علي فض الاعصام في دقائق معدودة وبالفعل تم اعتداء شامل على الاعتصام وضرب المواطنين بالرصاص الحي والمطاطي وأيضا عن إلقاء الحجارة وقطع الأثاث وألواح من الرخام من مبانى مجلسي الوزراء على المتظاهرين وعلى مدى أربعة أيام تعرض المتظاهرين للمطاردة والاعتداء والاعتقال والسحل والإهانات بطريقة أسوأ من أسلوب الداخلية الذي كان من أسباب قيام الثورة .. فقد كان العنف عشوائيا وشاملاً ، لم يميّز بين النساء والرجال والصحافيين الأجانب والمصريين والأطفال والمسنين وتوالت الهجمات على المعتصمين وفي أقل من ٤٨ ساعة قُتل ١٢ شخصاً على الأقل بينهم عالم أزهري وأصيب المئات واعتُقل أكثر من مئة مواطن تعرضوا للعنف أثناء اعتقالهم بالإضافة لواقعه سحل أحد المتظاهرات وتعرية جسدها بالكامل مما أدي لهجوم الاعلام الخارجي علي المجلس العسكري ووصفة بديكتاتور اسوء من مبارك ..

ومازالت حتي الان حملات الاعتقالات وتشوية المتظاهرين والثوار ووصفهم بالعملاء والخونة والممولين والبلطجية مستمرة في محاولة المجلس العسكري لإحداث انقسام في صفوف الشعب وإلهائهم عن مواجهه المجلس العسكري خصوصا مع اقتراب الذكري السنوية الاولي للثورة وتعالي العديد من الأصوات بقيام الموجة الثانية للثورة للإطاحة بذيول النظام السابق وتلاميذ مبارك وانهاء فترة الحكم العسكري اللي فضلت اكتر من 60 سنة وشهدت ابشع واقسي الفترات علي الشعب المصري …

———-

عرفتوا ليه احنا نازلين يوم 25 يناير 2012 علشان نكمل ثورتنا .. وعرفتوا ان المجلس العسكري محماش الثورة ولا حاجة ! بالعكس هو اللي بيقود الثورة المضادة عن طريق حملات التشوية وإثارة الفتنة والانقسامات بين الشعب وحملات الاعتقالات والاعتداء والقتل والسحل علي اي حد بيتكلم وبيعارض حكمهم وانتهاكتهم !! 

لو كنت مش فاهم او مش مقتنع بكلامي .. حاول تفهم بنفسك وراجع الاحداث ورتبها وفكر بالعقل في مين سبب كل المصايب ومين مصلحتة اننا نوصل للفوضي علشان نتلهي .. فكر في مين الي بيكذب ومين اللي بيقول وعود ومينفزهاش طول الوقت وبيماطل في كل قرارته وانت هاتعرف المفروض تعارض مين !!

ولو اقتنعت بس خايف تشارك في اعتراض الاحرار في بلدك علي الظلم والفساد .. يبقي ساعد حتي باقناع الناس وشارك علي الانترنت وخليك ايجابي 

ولو انت مقتنع وعامل نفسك مش مقتنع او بتجادل وتقاوح وخلاص يبقي صدقني انت مريض واللي زيك هما سبب كل القرف اللي احنا فيه بسلبيتك علشان انت ماينفعش يتقال عليك غير انك عالة وحسبي الله ونعم الوكيل في كل واحد بيبدي مصلحتة الشخصية علي مصلحة البلد او كل واحد بيحاول يحبط ارادة الشباب وخلاص لمجرد انه يبان معترض

موعدنا 25 يناير 2012 ان شاء الله .. ثورتنا مستمرة !!

By. Ahmed Rock 
تم الإستعانة بالعديد من المصادر في تجميع التواريخ والاحداث

يسقــــط حكـــم العســـكر

Recorded @ Revolution’s Home Studio
Lyrics & Performed By : Ahmed Rock
Music Produced By : Shehab El-Deen
Mixing & Mastering : teMraz
Graphics/Video By : Ahmed Rock


شعب ناقص

شعــب ناقــــص

Walk Like An Egyptian

باختصار وبكل بساطه احنا شعب ناقص

طبعا في ناس فكيكه شويه هتقول ده اكيد هيتكلم عن اننا لما بنسمع ان واحده اغتصبوها ولاهتكوا عرضها بنرمي اللوم عليها او بنعايرها .. او لما بنشوف واحده بتتسحل وبيقلعوها نقول ايه اللي نزلها ومخلهاش تلبس تقيل .. او لما نلاقي الجيش بيسحل وبيموت في ناس نقولوا دول شويه عيال صيع ونسمع كلام الحكومه ونقنع نفسنا انهم عيال بت كلب بالمبررات اللي هما مدينها لينا “زي انهم بيخربوا وبيقطعوا الطريق وبيبيعوا مخدرات والحوارات الحلوه دي” .. وحاجات كتير زي دي بقت تحصل للاسف ..فمعلش يامعلم الكلام ده بيحصل وحاجه اقل ما يتقال علي اللي بيعملها انه ناقص بس ده مش موضوعنا

في حاجات كتير اوي بتحصل وبنشوفها كل يوم وبتبين ان كل الشعب المصري بلا استثناء عنده عقده نقص – او زي مانا بقول “ناقص” – وهقولكوا علي شويه منهم.

يعني مثلا …لما تلاقي حاجه جايه عليك من بعيد كلها نور ملون وبتمشي بطريقه لولبيه لدرجه انك تحس ان كلام الناس بتاعه امريكا صح وان في كائنات فضائيه وانك شايف طبق طاير دلوقتي وسامع منه دوشه جامده تفتكرها صوت الموتور ويطلع صوت مهرجان وتكتشف ان دي فزبا وعيل راكبها وماليها نور ومعلي الكاسيت وماشي يتمرجح .. فده اكيد مش بيروشن الفزبا بتاعته ولا عشان بيحب الصوت العالي لكن عشان يلفت نظر الناس ويقول انا جدع انا كل الناس بتبصلي.. عشان يعوض احساسه بالضأله واحساسه بالنقص

او مثلا .. لما تلاقي واحد مسقط البنطلون ومبين البوكسر واللي تحت البوكسر واللي بين اللي تحت البوكسر ولابس هدوم عليها ترتر وحزام بينور ونضاره شمس واكله نص وشه ومطول ومفلفل شعره ده يبقي ايه ؟ موضه مثلا؟ لا هو بكل بساطه بيلبس كده عشان عاوز يلفت النظر وبيفرح لما الناس بتبصله عشان هو عنده احساس بقله اهتمام الناس بيه وصله لاحساس بالنقص

او مثلا .. تبقي قاعد في المشروع “الميكروباص” وتلاقي اللي وراك بيتكلم في التليفون بصوت عالي وعمال يحكي ازاي السفريه بتاعه فرنسا كانت حلوه وازاي ان الفرنسيات هجموا عليه وكانوا هايغتصبوه لما عرفوا انه مصري ومغامرات كتير اغرب من مغامرات سوبر هنيدي وتقول اكيد بيرسم نفسه قدام مزه حلوه قاعده جمبه وتلاقي المشروع كله رجاله ومناظرها غلط .. فده برضوا عشان يحسس الناس انه جامد ويعوض عقده النقص اللي جواه

او مثلا … تبقي بتكلم المزه بتاعتك كل يوم زي الفل وبتنزل معاها ومدلعها هدايا والذي منه ووانت معاها في مطعم وبتاكلوا اكله بنص مرتبك تلاقيها مره واحده بتقولك تعبانه الحقني وبتعمل ميته وتروح بيها اقرب مستشفي والدكتور يقولك دي صحتها احسن مني ومنك وبتستعبط وتمسك نفسك بالعافيه انك تديها فانوس”كشاف” يفش غليلك وتقول في عقل بالك معلش اهو دلع بنات .. فده برضوا مش دلع دي محاوله للفت النظر والانتباه وجي من احساس عندها بالنقص

وزي حاجات كتيراوي بنشوفها وبنقابلها وكمان بنعملها كل يوم من غير ما ناخد بالنا بس كلها بتثبت ان معظم السلوكيات الغريبه في مصر جايه من عقده نقص .. ومش هتتحل غير لما كل واحد فينا يتحط في مكانه الصح او يعمل الحاجه اللي هو بيحبها او يعمل اي حاجه تزود ثقته بنفسه وتخليه حاسس بقيمته .

Topic by.  teMraz

http://facebook.com/temraz

http://twitter.com/temrazzz

Caricature by.  Amr Shaltout

http://www.facebook.com/knight.am

Walk Like An Egyptian

وقت الثورجية

وقـــت الثورجيــــة

النهاردة 23 ديسمبر 2011 ..  من سنة عدت بالظبط احنا نزلنا أغنيه كانت غريبة علي ودان كل اللي سمعها .. أغنية (وقت الثورجية) اللي نزلت قبل ثورة مصر وحتي قبل ثورة تونس ..
أغنية وقت الثورجية كانت بتتكلم في ان اوضاعنا السياسية والإجتماعية في مصر بقت فعلا غير محتملة !  و اننا لازم نتكلم  ونصرخ ونقول اننا من حقنا نعيش احرار في بلدناا ونقول للناس قوموا اكسرواا ببان الخوف وكفاية سلبية 

كانت أوضاع البلد فعلا في حالة غير طبيعية و كمية فساد سياسي واجتماعي فوق الوصف .. مفيش أي نوع من أنواع  الحرية .. حتي الفنان اللي بيحاول يعمل أغنية يلمح بيها انه معترض علي النظام وده أضعف الإيمان كان بيشاور عقله قبل ما ينزلها  ميت مرة

المهم اتفقنا كلنا اننا هانكسر حاجز الخوف دة وهاننزل الأغنية اللي خالصة من فترة كبيرة  ضمن أغنيات ألبوم الثورجية اللي كنا شغالين فيه الوقت دة .. وقد كان .. ونزلت وقت الثورجية يوم 23 ديسمبر 2010 .. وعملت صدى كبير علي الانترنت واتكلمت عنها كزا جريدة ومجلة داخل وخارج مصر

دلوقتي مرت سنة كاملة علي كل الأحداث اللي شوفناها .. أعترضنا علي الوضع .. عملنا ثورة سلمية مبهره اتكلم عنها   العالم كله .. اسقطنا الرئيس مبارك .. لكن نظامه الفاسد لم يسقط .. ايوة لم يسقط 
ناس كتير شايفة ان وقت الثورجية خلاص خلص بمجرد ان ثورة 25 يناير خلصت بمجرد احتفال الناس في الشوارع برحيل مبارك .. هو مبارك فين دلوقتي ؟؟  طب حد يقولي ايه اللي اتغير في البلد ؟؟ ايام الثورة لو كننا صبرنا علي مبارك كان حيعمل انتخابات برضة بنفس الشكل اللي بيحصل دلوقتي بعد ما شاف الشعب ثار قدامه ومبقاش مستحمل .. وأكبر دليل علي كدة ان ايام مبارك النظام الأمني كان له نهج معين في التعامل مع اي حد يتكلم او يقرب من السياسة ودلوقتي نفس المنهج بيستخدمة المجلس العسكري ويمكن أسوء !!  أول شحنة في إشعال الثورة كانت وفاة خالد سعيد الله يرحمه اللي بدأ بعدها افراد من الشعب يفوقوا ويعملوا وقفات سلمية صامتة علي البحر في اسكندرية بعدين بقوا مئات ثم آلاف وكانوا بيضربوا ويتسحلوا ويعتقلوا لمجرد اعتراضهم !! دلوقتي الوضع أوسخ  وكلنا شوفنا مجازر ميدان التحرير ومجلس الوزرا ومسرح البالون و ماسبيرو وغيرهاااااا من ضرب وسحل وقتل و اعتقال ومحاكمات عسكرية للمدنيين بتهم التحريض ومناوئه المجلس العسكري

ابسط مبادىء الحرية و الديمقراطية إني لما اتظاهر محدش يفض مظاهرتي بالقوة ويعتقلني  .. اني لما اقول رأيي بصراحة في مدونة ولا علي تويتر أو الفايس بوك ماتحكمش عسكريا .. لما قناه فضائية تصور فضيحة مايرحوش يخدوا الشرايط اللي صوروها بالقوة .. مايطلعش علي النشطاء السياسين وشباب الثورة انهم بلطجية وعملاء وممولين من الخارج

 عشان كدة احنا لسة في وقت الثورجية !! حنثور علي كل ظالم و كل قاتل وكل ديكتاتور .. دم الشهداء اللي ماتوا من أول خالد سعيد لحد أخر شهيد مرورا بشيخ الأزهر والطلبة والدكاترة والمهندسين والغلابة وخيرة شباب البلد اللي قدموا حياتهم علشان برضة يفوقونااا مش هايروح هدر .. هانفضل ننزل الميادين وهانفضل نقول لأ للظلم والفساد .. هنفضل متمسكين بالأمل في الحرية هانفضل مقتنعين ان علشان تعيشوا في الدنيا .. لازم تبقوا ثورجية

By. Ahmed Rock / Essam C-X

Recorded @ Revolution’s Home Studio 
Music Produced By : Shehab El-Deen
Mixing & Mastering : teMraz
Graphics By : Ahmed Rock

رجعوا التلامذه – أحمد فؤاد نجم و الشيخ إمام

مش هلاقي كلام أحسن من كلمات عم أحمد فؤاد نجم وصوت الشيخ إمام

يعبر عن مظاهرات  طلبة الجامعة ..

وكأن الأغنية اتكتبت واتغنت النهاردة .. فعلا  إن غداً لناظره قريب


رجعوا التلامذة 

يا عم حمزة للجد تاني 
يا مصر إنتي اللي باقية 
و انتــــــــــي 
قطف الأماني 
لا كورة نفعت 
و لا أونطة 
و لا المناقشة و جدل بيزنطة 
و لا الصحافة و الصحفجية 
شاغلين شبابنا 
عن القضيـــة 
قيمولنا صهبة يا صهبجية 
و دوقونا طعم الأغاني 
رجعوا التلامذة 
للجد تـــــــاني 

طلعوا التلامذة ورد الجناين 
اسمع يا ميلص و شوف و عاين 
ملعون أبوك ابن كلب خاين 
يا صوت أميركا 
يا أمريكانـــــــي 
رجعوا التلامذة يا عم حمزة 
للجد تانــــــــــي 
يا مصر إنتي اللي باقية و انتــــــــــي 
قطف الأمانــــي

Follow

Get every new post delivered to your Inbox.